Kristjan Asllani ka ndërmarrë një hap të madh në karrierë duke u transferuar te një klub si Interi.
Mesfushori i Kombëtares shqiptare kaloi nga Empoli te Interi me formulën e huazimit me të drejtën e blerjes për shifrën e 14 milionë eurove dhe duke firmosur një kontratë 5-vjeçare me zikaltërit nga Milano.
Së fundmi, Interi ka publikuar një video në profilet e saja zyrtare në rrjetet sociale duke prezantuar Kristjan Asllanin si një “Top Player” dhe fantazisti shqiptar në këtë video ka dhënë disa shprehje interesante për ngjitjen e menjëhershme në karrierë:
“Të lëvizësh gjithmonë. Të mos ndalosh kurrë! Nga një shtëpi në tjetrën, brenda dhe jashtë fushës. Gjithmonë! Pa asnjë pushim, për kilometra e kilometra. Me topin në këmbë dhe në kokë, vetëm kështu mund të ngjitem gjithmonë lart e më lart. Unë jam Kristjani, unë jam Inter!”.
Në sezonin e fundit me fanellën e Empolit në Serinë A, Kristjan Asllani u aktivizua gjithsej në 23 ndeshje duke shënuar 1 gol dhe duke dhuruar gjithashtu edhe 1 asist.
